VII/22-ноос Евразийн улс орнуудтай байгуулсан Чөлөөт худалдааны түр хэлэлцээр хэрэгжинэ

Монгол-Евразийн стратегийн ярианы хэлэлцээ арга хэмжээний хүрээнд "Монгол, Евразийн санхүү, худалдааны хамтын ажиллагаа" цахим хэлэлцүүлэг зохион байгуулагдлаа. Энэ хэлэлцүүлэгт Евразийн эдийн засгийн комиссын Худалдааны бодлогын газрын орлогч захирал Михаил Черекаев оролцсон байна. Тэрээр Чөлөөт худалдааны түр хэлэлцээрийн хүрээнд бий болох давуу талууд болон ЕАЭЗХ-ны орнууд, Монгол Улсын хоорондын худалдааны боломжийг бүрэн ашиглахын тулд оролцогч талуудын хэрэгжүүлж буй үйл ажиллагааны талаар мэдээлэл өглөө.

Тэрээр, "Бид Монгол Улстай байгуулсан Түр хугацааны худалдааны хэлэлцээрийг хүчин төгөлдөр болсон эхний өдрөөс нь үр дүнтэй хэрэгжүүлэхийг зорьж байна. Үүнтэй холбоотойгоор бид Евразийн эдийн засгийн холбооны хүрээнд болон Монголын талтай хамтран шаардлагатай ажлуудыг хийж байна. Энэ хүрээнд хамтын ажиллагааны олон чиглэлээр хэд хэдэн төсөл хэрэгжүүлэхээр төлөвлөж байна" гэж мэдэгдсэн байна.

Хэлэлцээр хэрэгжих эхэлснээр 367 төрлийн бараагны ангилалд ногдуулах гаалийн тарифыг тэглэх эсвэл бууруулах зохицуулалт хэрэгжих юм. Уг хэлэлцээрийг 3 жилийн хугацаатай байгуулсан бөгөөд дахин 3 жилээр сунгах боломжтой юм байна.

Төгрөгийн ханш 10-ийн бүлгийн голлох валютуудын эсрэг чангарлаа

Мягмар гарагт төгрөгийн ханш ам.доллар, юань, рубль, иен, евро, фунт стерлинг зэрэг 10-ийн бүлгийн голлох валютуудын эсрэг чангарлаа. Олон улсын зах зээлд еврогийн ханш сүүлийн арилжааны дөрвөн өдөр дараалан суларсантай зэрэгцээд дотоодод төгрөгийн ханш еврогийн эсрэг гуравдугаар сарын 16-наас хойших хамгийн чанга түвшинд хүрээд байна. Мөн арилжааны нэг өдөр австрали долларын эсрэг 5.96 нэгжээр чангарсан бол вон, юаньтай харьцах ханш тогтвортой байна.

Мягмар гарагт гадаад валютын дуудлага худалдаагаар арилжааны банкнуудаас 55 сая ам.доллар авах захиалга ирүүлсэнийг Монголбанк 100 хувь биелүүлсэн бол своп, форвард хэлцлийн санал ирүүлээгүйг цахим хуудастаа мэдээлжээ.

Лхагва гарагт Монголбанк 12 хувьд хадгалагдаж байгаа бодлогын хүүг өөрчлөх эсэх тухай Мөнгөний бодлогын хорооны шийдвэрээ албан ёсоор танилцуулна. Өмнөх хурлаас арилжааны банкнуудын 360 хоног болон гурав хүртэлх жилийн хугацаатай гадаад зах зээлээс татсан санхүүжилтийн 25 хувьд ногдох хэсгийг заавал байлгах нөөцөд тооцох шийдвэр гаргасан. Энэ зохицуулалт ирэх аравдугаар сараас мөрдөгдөж эхэлнэ.

Өнгөрсөн долоо хоногт АНУ-ын Холбооны Нөөцийн банк бодлогын хүүг хэвээр үлдээж, 2026 оны эцэс гэхэд өсгөх орон зай бий гэсэн дохиог зах зээлд өгсөн юм. Үүний дараа ам.долларын ханш 13 сарын дээд түвшинд хүрч өсөөд буй. Бусад валютуудын хөдөлгөөнийг харвал Японы иенийн ханш сүүлийн 40 орчим жилийн хамгийн доод түвшинд арилжаалагдаж байгаа бол Их Британийн Ерөнхий сайд албан тушаалаасаа огцрох тухай мэдэгдэл хийсний дараа фунт стерлингийн ханш сулраад байна.