Ши Жиньпин эдийн засгаа дэмжих арга хэмжээг 2025 онд ч үргэлжлүүлэхээ амлав
БНХАУ-ын 2024 оны дотоодын нийт бүтээгдэхүүний өсөлт зорилтот таван хувьдаа хүрэх төлөвтэй байгааг тус улсын Ерөнхийлөгч Ши Жиньпин мэдэгдлээ. Тэрбээр шинэ оныг угтаж хэлсэн үгэндээ "БНХАУ-ын эдийн засаг ерөнхийдөө тогтвортой, өсөлттэй байна" гэж тодотгосон байна.
БНХАУ-ын эдийн засаг 2024 онд таван хувиар өсөх нь төлөвлөгөөгүй зорилт гэж олон шинжээчид анхааруулж байсан ч Ши Жиньпиний хэлсэн үг тус улсын эдийн засгийн өсөлт зорилтдоо хүрэх үү, үгүй юу гэсэн тодорхойгүй асуултад цэг тавилаа.
Албан ёсны үзүүлэлт мэдээллийг ирэх хоёрдугаар сард танилцуулна. Тус улсын бодлого боловсруулагчид есдүгээр сарын эцсээс эхлэн эдийн засгаа дэмжих хэд хэдэн бодлогын арга хэмжээ танилцуулсан юм. Үүний үр дүнд эдийн засгийн өсөлтийн төлөв нь сайжирч, тус улсын дотоодын нийт бүтээгдэхүүн 2024 онд 4.8 хувиар эрчимжсэн байх төлөвтэй гэж шинжээчид таамаглаж байна
Ши Жиньпин БНХАУ-ын улс төрийн товчоонд хандаж хэлсэн үгэндээ “2025 онд ч эдийн засгаа дэмжсэн арга хэмжээгээ үргэлжлүүлж, макро эдийн засгийн илүү идэвхтэй бодлого хэрэгжүүлэх”-ийг уриалав.
Мөн БНХАУ-ын эдийн засагт тулгарч буй сорилтууд, тэр дундаа гадаад тодорхойгүй байдал, эдийн засгийн өсөлтийн шинэ хөдөлгөгч хүчинд шилжих шаардлагатай болсныг хүлээн зөвшөөрч, тэдгээр сорилтуудыг даван туулна гэдэгт итгэлтэй хэвээр байхыг ард иргэддээ уриалсан байна.
Үүнээс гадна Төрийн албан хаагчдын цалинг улс сүүлийн жилүүдэд анх удаа нэлээдгүй өндөр дүнгээр буюу үндсэн цалинг багадаа 500 юань буюу 68.51 ам.доллароор нэмэгдүүлэхээр болсныг ойрын эх сурвалж мэдээллээ. Цалингийн нэмэгдэл нь үндсэн цалингаас хамаарч өөр өөр байх бөгөөд ойролцоогоор таван хувиар нэмэгдэж байгаа аж. БНХАУ хамгийн сүүлд 2015 онд Төрийн албан хаагчдын цалинг нэмсэн бөгөөд 40 сая орчим ажилтны цалин сард дунджаар 300 юаниар нэмэгдэж байжээ.
Олон нийтийн сүлжээгээр Төрийн албан хаагчдын цалинг 2018, 2021 онд нэмж байсан гэж мэдээлсэн ч Засгийн газраас нь цалин нэмэгдсэн гэсэн мэдээллийг баталгаажуулаагүй бөгөөд хэдэн хувиар нэмсэн нь тодорхойгүй байдаг аж.
БНХАУ-ын Коммунист нам энэ удаагийн цалингийн өсөлтийн талаар олон нийтэд мэдэгдэл хийгээгүй байгаа нь хөтөлбөрийн цар хүрээг тодорхойлох, хуулийн төслийн талаар нарийн тодорхойлоход хэцүү болгож байна.